Kion mi faru nun?

Karaj NASKanoj,

La fino de la NASK-kursaro de 2002 ne estas la fino de via lernado de Esperanto! Lerni novan lingvon, kiel vi bone scias, estas malfacile. Esperanto estas pli facila ol aliaj lingvoj, sed tamen oni devas dedicxi iom da tempo kaj peno por progresi.

Post via vojagxo hejmen, kion vi povos fari praktike por dauxre lerni, sen la helpo de niaj instruistoj kaj la aliaj kursanoj cxi tie en Vermonto? Jen mi proponas kelkajn ideojn; certe vi povos elpensi aliajn.

• Ne forgesu ke ekzistas la interreto kaj e-posxto! Vi havas la adresaron, kaj cxiu cxi tie estas atingebla mirinde rapide kaj simple. Do ne hezitu skribi al viaj amikoj kaj kunklasanoj. Vi povas peti helpon, trovi respondojn al demandoj pri la lingvo, kaj ecx pli grave vi povas tiel uzi la lingvon. Se vi ne skribas perfekte, ne gravas. Via kapablo uzi la lingvon plibonigxos iom post iom. (Kaj estas certe, cxu ne, ke se vi ne uzos la lingvon, vi ne progresos . . . )
• Mi rekomendas ke vi faru ion pri Esperanto cxiun tagon, ecx se nur dum kvin aux dek minutoj. Esperanto estas tia, kia per malmulte da tempo vi povas vere lerni kaj gajni. Kaj ne planu dedicxi ekzemple unu horon cxiun tagon al la studado; tuj venos tago kiam tio ne eblos, kaj vi malkuragxigxos . . . sed certe en iu ajn tago vi povos trovi kvin minutojn por . . . kion fari? Legi unu pagxon en via lernolibro; skribi mallongan e-posxtan mesagxon; lerni 2-3 novajn vortojn; kanti kanton; ktp. La sekreto estas cxiutage fari ion.
• Versxajne vi jam havas lernolibron kaj vortaron. Ne hezitu uzi ilin. Cxiuj el ni devas sercxi vortojn en la vortaro. Tio ne signifas ke vi ne lernas la lingvon, nur ke vi gxis nun ne lernis cxion en gxi.
• Kaj fine (ne cxar vere temas pri la fino de ideoj, sed nur cxar mankas tempo . . . ), ne haltu en la lernolibro, sed legu ion pli interesan. En nia Esperanto-mondo ekzistas mirinda literaturo. Vi trovos la tradukojn de Winnie-la-Pu, La Hobito, La Mastro de l' Ringoj, Sherlock Holmes; vi trovos amrakontojn, krimromanojn, multe da poezio; vi trovos fabelojn kaj fablojn, fe-rakontojn; vi trovos humurajxojn, sxercojn; kaj vi trovos seriozajn eseojn kaj klerigajn artikolojn. Mi kuragxigas vin acxeti almenaux unu libron en Esperanto . . . lernolibro helpos vin lerni, sed ordinara libro helpos vin gxui la lingvon! En Usono vi povas acxeti librojn de ELNA (http://www.esperanto-usa.org), kaj la Universala Esperanto-Asocio (http://www.uea.org) havas mirindan libroservon. Do esploru, trovu, kaj gxuu.

Mi devas rapide fini, sed laste mi diru: Vi havas mian ret-adreson (en cxiu numero de La NASKa Fasko), kaj se vi bezonas helpon, klarigon, aux kuragxigon, ne hezitu skribi rekte al mi. Mi aux helpos, aux trovos iun alian kiu povos. Licxjo