Kion mi faru nun?

Karaj NASKanoj,

La fino de la NASK-kursaro de 2002 ne estas la fino de via lernado de Esperanto! Lerni novan lingvon, kiel vi bone scias, estas malfacile. Esperanto estas pli facila ol aliaj lingvoj, sed tamen oni devas dediĉi iom da tempo kaj peno por progresi.

Post via vojaĝo hejmen, kion vi povos fari praktike por daŭre lerni, sen la helpo de niaj instruistoj kaj la aliaj kursanoj ĉi tie en Vermonto? Jen mi proponas kelkajn ideojn; certe vi povos elpensi aliajn.

• Ne forgesu ke ekzistas la interreto kaj e-poŝto! Vi havas la adresaron, kaj ĉiu ĉi tie estas atingebla mirinde rapide kaj simple. Do ne hezitu skribi al viaj amikoj kaj kunklasanoj. Vi povas peti helpon, trovi respondojn al demandoj pri la lingvo, kaj eĉ pli grave vi povas tiel uzi la lingvon. Se vi ne skribas perfekte, ne gravas. Via kapablo uzi la lingvon pliboniĝos iom post iom. (Kaj estas certe, ĉu ne, ke se vi ne uzos la lingvon, vi ne progresos . . . )
• Mi rekomendas ke vi faru ion pri Esperanto ĉiun tagon, eĉ se nur dum kvin aŭ dek minutoj. Esperanto estas tia, kia per malmulte da tempo vi povas vere lerni kaj gajni. Kaj ne planu dediĉi ekzemple unu horon ĉiun tagon al la studado; tuj venos tago kiam tio ne eblos, kaj vi malkuraĝiĝos . . . sed certe en iu ajn tago vi povos trovi kvin minutojn por . . . kion fari? Legi unu paĝon en via lernolibro; skribi mallongan e-poŝtan mesaĝon; lerni 2-3 novajn vortojn; kanti kanton; ktp. La sekreto estas ĉiutage fari ion.
• Verŝajne vi jam havas lernolibron kaj vortaron. Ne hezitu uzi ilin. Ĉiuj el ni devas serĉi vortojn en la vortaro. Tio ne signifas ke vi ne lernas la lingvon, nur ke vi ĝis nun ne lernis ĉion en ĝi.
• Kaj fine (ne ĉar vere temas pri la fino de ideoj, sed nur ĉar mankas tempo . . . ), ne haltu en la lernolibro, sed legu ion pli interesan. En nia Esperanto-mondo ekzistas mirinda literaturo. Vi trovos la tradukojn de Winnie-la-Pu, La Hobito, La Mastro de l' Ringoj, Sherlock Holmes; vi trovos amrakontojn, krimromanojn, multe da poezio; vi trovos fabelojn kaj fablojn, fe-rakontojn; vi trovos humuraĵojn, ŝercojn; kaj vi trovos seriozajn eseojn kaj klerigajn artikolojn. Mi kuraĝigas vin aĉeti almenaŭ unu libron en Esperanto . . . lernolibro helpos vin lerni, sed ordinara libro helpos vin ĝui la lingvon! En Usono vi povas aĉeti librojn de ELNA (http://www.esperanto-usa.org), kaj la Universala Esperanto-Asocio (http://www.uea.org) havas mirindan libroservon. Do esploru, trovu, kaj ĝuu.

Mi devas rapide fini, sed laste mi diru: Vi havas mian ret-adreson (en ĉiu numero de La NASKa Fasko), kaj se vi bezonas helpon, klarigon, aŭ kuraĝigon, ne hezitu skribi rekte al mi. Mi aŭ helpos, aŭ trovos iun alian kiu povos. Liĉjo