Kulturdependaj Gestoj: Interkomparo
Jean-Luc Tortel
Francio

Mi enketis pri kelkaj gestoj laŭ la malsamaj kulturoj de la pridemanditoj. Mi startis ne de la gestoj, sed male de l' intencoj mem: "Kiel vi gestas tion aŭ ĉi tion?" Mi demandis ĉirkaŭ mi, kaj ankaŭ ĉe gestudentoj en la manĝejo; ne estas facile, ĉar homoj rapide laciĝas. Mi volas nur akcenti la diferencojn, aŭ la apartaĵojn; la similaĵoj estas malpli interesaj.

Indiki, ke iu perdis la prudenton (troige, ke frenezas), oni uzas en

• ĉiuj landoj: rondirigi la montrofingron ĉirkaŭ la tempion,
• Francujo: meti tiun fingron sur la tempion kaj imiti ŝraŭbadon,
• Pollando, Hungario: frapeti la frunotn per la montrofingro.

Diri geste "honton al vi!", oni uzas en

• ĉiuj landoj: nenion,
• Francujo: (malofta gesto) "kornumi" al iu per la etfingro kaj la montra fingro,
• Usono: (ŝajne nur tie kaj nur inter infanoj!) unu montrofingro kvazaŭ akrigas la alian! (kiel oni akrigas klingon!).

Rifuza gesto (ekzemple, ĉe propono de fidrogo), oni uzas en

• ĉiuj landoj: (inkluzive de Mikronezio--insulo Pohnpeh; arkipelago de Guam) levi la polmon al la proponanto kaj movi ĝin alternative (flanken-aliflanken),
• Francujo kaj Hungario: kvazaŭ repeli ion per ambaŭ manoj, kun polmoj antaŭen,
• Israelo: sama gesto kiel en Francujo, sed nur per unu mano, dum la alia tenas la pojnon de la unua.

Indiki ke iu blufas, oni uzas en

• Francujo: sveligi la vangon, kaj kvazaŭ piki ĝin per la montrofingro, same kiel por krevigi pufan pilkon,
• Brazilo: tuŝeti al si la mentonon per la fingropintoj,
• Guam-insularo: (Mikronezio) la mano kvazaŭ deturnas ion flanken,
• aliaj landoj: (interalie Usono, Israelo . . . ) karesi al si la nazon.

Indiki ke oni posedas nenion (aŭ ankaŭ ke oni povas nenion fari, neniel helpi), oni uzas en

• Francujo: turni ambaŭ manojn kun polmoj supren,
• Israelo: fari la geston returni siajn poŝojn,
• Usono: strange, aperis 3 gestoj:
  • same kiel la francoj,
  • oni etendas la manojn kun la polmoj malsupren, disigas la etenditajn fingrojn, kaj movas la manojn alterne de unu flanko al alia,
  • same kiel en Israelo.

. . . Kompreneble tio estus senfina tasko, kolekti tiun materialon . . . Tamen ŝajnas al mi konsiderinde, starti ne de la gesto mem, kiel Gesture de Desmond Morris, sed de la intenco de l' "parolanto" (muta, fakte!).