Bonvenon en San-Francisko!

Lee MILLER

Al ĉiuj studentoj de la ĉi-jara kursaro ni donas plej korajn salutojn. Ni feliĉas ke vi estos inter ni dum la venontaj du semajnoj, kaj jam antaŭvidas plenplenajn tagojn de studado, parolado, ekskursado, amuzado, kaj diversaj aliaj "adoj". Nepre kaptu la okazon paroli nian lingvon; malofte oni povas paroli Esperanton de unua taglumo ĝis enlitiĝo, kaj eĉ meznokte!

Pri La NASKa Fasko

Lee MILLER

Nun salutas vin via redaktisto, Lee Miller, kiu loĝas en la usona ŝtato Misurio. (Ĉar mia nomo "Lee" kaj "li" prononciĝas same, miaj amikoj en Sankta-Luiso komencis nomi min "Liĉjo" . . . do jen taŭga solvo kontraŭ ebla konfuzo). Estas mia plezuro redakti la tagan ĵurnalon la duan fojon!

Pri la nomo de la ĵurnalo, mi klarigu. Pasintsomere la kursaro unue havis la nomon "NASK", kaj kiam mi planis la ĵurnalon mi serĉis taŭgan nomon. Pro la rimo mi elektis la nomon "Fasko". Kio estas fasko? El la Plena Ilustrita Vortaro, mi citu:

fask/o 1 Aro de samspecaj longformaj objektoj, kune tenataj aŭ ligitaj . . .
4 (figurasence) Kuniĝo kaj unuiĝo . . .

Do temas unue pri la paĝoj kaj paperoj de la ĵurnalo, kiuj estas kune ligitaj, sed pli grave temas pri ni-la kursanoj-kiuj estas kunaj. "Kuniĝo kaj unuiĝo" fakte povus esti nia moto dum NASK 2001.

Kore, Liĉjo

Kelkaj Anoncoj kaj Informoj

Ĉi-jare okazos du klasoj: La "Progresiga" Klaso (en ĉambro UC 417), kiun instruas Grant Goodall, kaj la "Metodika" Klaso (en ĉambro UC 419), kiun instruas Duncan Charters kaj Derek Roff. (Kelkfoje la klasoj okazos en aliaj lokoj; ni anoncos la ŝanĝojn).

La kutimaj klashoroj estas de la 8:30-a ĝis la 11:30-a atm. Atentu ke ja okazos klasoj la 4-an de julio!

Lundon vespere (hodiaŭ) okazos Interkona Vespero en la "formala salono" apud la akceptejo en nia dormejo. La vespero komenciĝos je la 7:30-a ptm, kaj daŭros ĝis la 9:00-a ptm.

Mardon vespere (morgaŭ) okazos prezento de la instruistoj, per intervjuo kaj aliaj metodoj . . . nepre ĉeestu! Ni anoncos la lokon morgaŭ matene.

Se vi havos proprajn anoncojn aŭ informojn por la ĵurnalo, bonvolu doni ilin rekte al Lee (Liĉjo) Miller. La horlimo por materialo estas la 9:00-a ptm; se vi volos havi ion en la sekva numero vi devos doni ĝin antaŭ tiu horo.